Monday, October 06, 2008

Poem About Delhi - Dilwalon Ki Dilli

Dilwalon Ki Dilli

Bharat ki rajdhani dilli, dilwalon ki matwali dilli
Yahan jo na aaye wah aana chahey, aur jo aaye wah bahut pachtaye.

Yahan ki sadke aisi mano ghaddho ki ho bichi tashtari,
Sadko par hai road rage ka bolbala, Jaldi mein hai har ek dilli wala.

Apni lane chodne ki kasam sabne khayee hai,
Aur aage nikalne ki race mein kitno ne jaan gavayee hai.

Traffic rules todhne ka yahan hai fashion bahut bada,
Kahin chalan na ho jaye, isse koi kab dara.

Auto walon se insaniyat ki umeed karna fizool hai,
"Meter kharab hai", aisa kah muh mangi keemat lena inka usool hai.

Aurton ki to izzat karna yahan kisi ne seekha hi nahi,
Dilli metro ki ladies seat par bhi aadmiyon ki sena chadhi.

Aaye din kayee ghanton ke liye yahan bijli gul ho jaate hai,
Andhera jinhe pasand nahi, unsab ki shamat aati hai.

Dukaan daar bhi grahakon ko unki status se pahchante hai,
Yadi aapme dum nahi, to wah aapko undekha kar jaate hai.

Akhbaar ke panne keval chori, dakaitee aur jaalsaazi ke khabro se bharpur hai,
Kya yahi wah dilli hai jispar dilli walon ko itna guroor hai?

Contributed By : Akanksha is a freelance writer. akanksha_sinha@hotmail.com
+++++++++++++++++++++++++++++++++++++++++++++++++++++++++++
More Poems in English & Hindi

To contribute a poem to contentwriter.in, click here

Technorati Tags: poems, india, contentwriter.in

No comments:

Followers