Monday, October 12, 2009

Poem in Hindi - Kya Naam Doon?

Poem in Hindi - Kya Naam Doon?

Adhuri Zindagi hai kuch to kami hai,
Jiski wajah se dhadkan abhi thami nahi hai,

Usi cheez ki khoj abhi baaki hai,
Shayad isi liye maut ko humne naa ki hai,
Koshish karta hu aapke sath use dhoondh paaunga,
Nahi to adhura sa hi reh jaaunga

Koi ise khwab kehta hai to koi tamanna,
Koi chaahat kehta hai to koi sapna,
Koi ummeed kehta hai to koi aarzoo,
Koi aasha kehta hai to koi aas,
Kuch to bataao kya naam doon?

Kisi ne isko pane me zindagi guzar di,
Kisi ne iske liye khuda se zindagi udhar li,
Kisi ne ise pyaar se taraasha,
To kisi ne ise bazaar me talaasha,
Kuch to bataao kya naam doon ?

Kisi ne paakar iski keemat pehchani,
Kisi ne isko pane ki saanso me thani,
Kisi ne nazdeek aakar bhi ise gawaya
Kisi ne sab kuch khokar bhi ise paaya
Kuch to bataao kya naam doon ?

Kisi ne isko bhagwan ka darja diya
Kisi ne isko apno ke liye kurban kiya
Kisi ne isko paakar jeet manayi
Kisi ne isko khokar zinadagi gawayi
Kuch to bataao kya naam doon ?

Kisi ne isko zindagi ka maksad banaya
Kisi ne isko farz samajhkar nibhaya
Kisi ne isko aisho aaram me paaya
Kisi ne isko sangharsh sa bataya

Itna kuch keh diya par naam nahi samajh paaya
Shayad ye ek paheli hai jise main bujh na paaya
Phir bhi kuch to hai zindagi me adhura
Jiske hone se shayad main ho jaaun poora.


Guest Post by Saurabh Taneja  saurabhtaneja1@gmail.com

Inviting all story tellers to share their children stories, short stories and poems with us!

No comments:

Followers